1 பேதுரு 1 : 7-10 26 அக்டோபர் 2026, திங்கள்
“தமது மிகுந்த அன்பினிமித்தம், மீறுதல்களினால் நாம் மரித்தவர்களாயிருக்கையிலேயே நம்மைக் கிறிஸ்துவோடுகூட உயிர்ப்பித்தார். கிருபையினாலே இரட்சிக்கப்பட்டீர்கள்.” – எபேசியர் 2 : 5
எல்லைப் பாதுகாப்பு என்பது ஒவ்வொரு நாட்டிற்கும் அந்த நாட்டில் தீவிரவாதிகளின் ஊடுருவலைத் தவிர்க்க மிக முக்கியமானது. அதையும் மீறி எல்லையைத் தாண்டி வரும்போது அவர்கள் குற்றவாளிகளாய் கருதப்பட்டு தண்டனை பெறுவார்கள். எல்லைக் காவல் படையினர் அவர்களை சுட்டுக் கொல்வதும் உண்டு. மீறுதல் மரண தண்டனையைப் பெற்று தருகிறது.
தியான பாகத்தில் பவுலடிகளார், மீறுதலினால் மரித்த நிலையும், அம்மரணத்தில் இருந்து இரட்சிப்பும் கடவுளின் கிருபையினால் இயேசு கிறிஸ்துவில் கிடைக்கிறது என்று குறிப்பிடுகிறார். முதல் மனிதன் ஆதாம், ஏவாளை கடவுள் படைத்தார். கடவுள் அவர்களை ஏதேன் தோட்டத்தில் வைத்தார். தோட்டத்தின் நடு மரத்தின் கனியை சாப்பிடக் கூடாது என்று கட்டளையிட்டார். அவர்களோ கடவுளின் கட்டளையை மீறி கடவுளுக்கு விரோதமாக பாவம் செய்தார்கள். அவர்கள் வழியாக பாவம் உலகத்தில் வந்தது. பாவத்தின் சம்பளமாக மரணமும் இவ்வுலகத்தை ஆண்டு கொண்டது.
எனவே, ஒரு மனிதன் பாவத்தில் பிறக்கிறான். பாவத்தில் பிறந்த மனிதன் மீறுதலினால் ஆன்மீக வாழ்வில் மரித்து இருக்கிறான். மரித்த நிலையில் உள்ள ஒருவன் கடவுளை சுயமாக அண்டி சேர்ந்து கொள்ள இயலாது. கடவுளே தமது கிருபையினால் நம்மை விடுதலையாக்க விரும்பினார். தமது சொந்த குமாரனாய் இயேசுவை இவ்வுலக இரட்சிப்பிற்காக அனுப்பினார். உலகத்தின் பாவத்தைச் சுமந்த தேவ ஆட்டுக்குட்டியாக தமது சிலுவை மரணத்தின் வழியாக அவர் சிந்தின இரத்தத்தினால் பாவ மன்னிப்பாகிய இரட்சிப்பை தந்தார். இயேசுவை விசுவாசிப்பதினால் மீறுதலினால் மரித்த ஒருவர் உயிர்பிக்கப்படுகிறார். புதுவாழ்வு பெறுகிறார். கடவுளின் திருவார்த்தையிலும் சாக்ரமெந்திலும் பாவமன்னிப்பாகிய மீட்பு இன்றும் இலவசமாய் நமக்குத் தரப்படுகிறது. இலவசமாய் பெற்றுக் கொண்ட புதுவாழ்வில் நிலைத்து வாழ தூயாவியானவர் நமக்குத் துணை செய்வாராக.
கிருபையுள்ள கடவுளே! கிறிஸ்துவில் நாங்கள் பெற்றுக் கொண்ட புதுவாழ்வில் நிலைத்து வாழ உதவி செய்தருளும். ஆமேன்.