சங்கீதம் 67 : 1-3 07 அக்டோபர் 2026, புதன்
“கோடைகாலத்தில் சேர்ப்பவன் புத்தியுள்ளவன், அறுப்பு நாளில் தூங்குபவன் இலச்சை வருவிப்பான்.” – நீதிமொழிகள் 10 : 5
எனக்கு தெரிந்த ஒருவருக்கு இரண்டு மகன்கள். அதில் ஒருவர் மிகவும் சுறுசுறுப்பானவர். நன்றாக படிக்கக்கூடியவர். எல்லாவற்றையும் நேர்த்தியாக செய்யக்கூடியவர். தனது அயராத உழைப்பினால் நல்ல வேலைக்குச் சென்று நல்ல ஊதியம் பெற்றார். மற்றோரு மகன் மிகவும் சோம்பல்தனம் கொண்டவர். தன் வாழ்க்கையில் பாதி நேரம் தூங்குவதிலும், சோம்பலோடும் வாழ்ந்தார். எனவே நல்ல வேலை இல்லை, நல்ல வருமானம் இல்லை. வாழ்க்கை அவருக்கு நிந்தையாய் அமைந்தது.
தியான பாகத்தில், சாலொமோன் ஞானி, சேர்ப்பவன் புத்தியுள்ளவன் என்றும் தூங்குபவன் இலச்சை அனுபவிப்பான் என்றும் குறிப்பிடுகிறார். அறுவடை காலத்தில் முழுமையாய் நமது உழைப்பைத் தந்து அறுவடை பலனை சேர்த்து வைப்பது அவசியம் என்றும் அப்படி செய்கிறவன் புத்தியுள்ளவன் என்று சாலொமோன் சொல்லுகிறார். அதே நேரத்தில் அறுவடை காலத்தில் தூங்குபவன் தனக்கு இலச்சை, வெட்கத்தையே சேர்த்துக் கொள்ளுவான்.
இவ்வுலக வாழ்க்கை கடவுள் நமக்குத் தந்த ஆசீர்வாதம். அவரின் கிருபையினால், இயேசுவில் கடவுளின் பிள்ளைகளாய் இருக்கிறோம். கடவுள் நமக்கு தந்துள்ள வேலை நேரத்தை, திறமைகளை சரியாக பயன்படுத்திக்கொள்ள வேண்டும். நாட்கள் பொல்லாதவைகளானதால் காலத்தை பிரோஜனப்படுத்திக் கொள்ளுங்கள் என்று கடவுளின் வார்த்தை நமக்கு சொல்லுகிறது.
இவ்வுலக வாழ்வில் நாம் பெற்றுக் கொள்ளுகிறது எல்லாம் கடவுள் தருகிறது. அவைகளை அவரின் நாம மகிமைக்கென்று பயன்படுத்த அர்பணிப்போம். கடவுளின் பிள்ளைகளாய் அவரின் பணி செய்வதும் நம் மேல் விழுந்த கடமை. ‘அறுப்போ மிகுதி ஆட்களோ குறைவு’ என்று ஆண்டவர் குறிப்பிடுகிறார். கடவுளின் அன்பை, இயேசுவில் அவர் தரும் மன்னிப்பைத் தருவதே அவர் பணி என்று உணர்ந்து செயல்பட அவர் தாமே நமக்கு உதவி செய்வாராக.
அன்பின் கடவுளே! நீர் தந்த காலத்தைப் பயன்படுத்தி வாழ கிறிஸ்துவில் கிருபை செய்தருளும். ஆமேன்.