Daily Devotional

Daily Devotional 2017-05-12T02:11:34+00:00

2 பேதுரு 1 : 2-8                                       14 டிசெம்பர், 2018 வெள்ளி

“கடவுளையும் … ஆண்டவராகிய இயேசுவையும் அறிகிற அறிவினால் … கிருபையும் சமாதானமும் பெருகக்கடவது.” – 2 பேதுரு 1 : 2

நாம் எவ்வளவுதான் விழிப்புடன் இருந்தாலும், எப்படியோ போலிப் பொருட்களை, தரம் கெட்ட பொருட்களை வாங்கி ஏமாந்துவிடுகின்றோம்.

கடவுளை அறிகிற அறிவிலும், பல நேரங்களில் போலியான போதனைகளைக் கேட்டு ஏமாந்து விடுகிறோம். தேவ மைந்தன் இயேசு கிறிஸ்துவின் வழியாக மனிதன் பெறும் மன்னிப்பும் சமாதானமுமே உண்மையானது, நிலையானது என்பதை ஒரு வாழ்த்துதலாக தியானப் பகுதியில் சொல்லுகிறார் பேதுரு. பேதுரு உற்சாகமுள்ள இயேசுவின் சீடர். ஆயினும் சிலபொழுது கோழையாகவும் நடந்து கொண்டார். இவரிடம்தான் என் ஆடுகளை மேய்ப்பாயாக என்று இயேசு கூறினார். கோழையான பேதுரு இயேசுவின் ஆணை பெற்று, பலங்கொண்டார். வேறொருவராலும் இரட்சிப்பில்லை. நாம் இரட்சிப்பைப் பெறுவதற்கு வானத்தின் கீழ் மனுஷருக்குள் அருளப்பட்ட வேறொரு நாமமில்லை என்று அன்றைய உலகுக்கு உறுதிபடக் கூறினார் பேதுரு. ஆண்டவராகிய இயேசுவை அறிகின்ற அறிவுதான் மனிதனுக்கு தெய்வீக சமாதானத்தைத் தரும். பாவத்தை மன்னித்து, நம்மைத் திரும்பவும் கடவுளின் குடும்பத்தின் உறுப்பினர் ஆக்குவது இயேசுதானே. நாம் தேவகுடும்பத்தின் உறுப்பினர் என்பதால், நாம் கிருபையை அனுபவித்துக் கொண்டேயிருப்பவர்கள். இந்த தெய்வீக சமாதானத்தை நாம் பெற்றிருப்பதால், `இயேசுவே ஆண்டவர்’ என்று அறிக்கை செய்ய, பரிசுத்த ஆவியானவரின் துணையையும் நாம் பெறுகிறோம்.

ஆண்டவரை அறிந்திருக்கிறீர்களா? கடவுளின் கிருபையைச் சரியாகப் புரிந்திருக்கிறீர்களா? தெய்வீக சமாதானத்தைப் பெற்றவர்களா நீங்கள்? அல்லது `ஆண்டவரை அறிவேன்’ என்று சொல்லும் போலியா நீங்கள்? பதில் உங்களுக்குத் தான் தெரியும். பதிலை ஆண்டவரிடமே கூறுங்கள்.

அன்புள்ள கர்த்தாவே, நாங்கள் உம்மை அறிந்து கொள்வதற்கு நீர் எங்களுக்குக் கிருபை தந்ததற்காக நன்றி. போலித் தனமில்லாமல் உமது கிருபையையும், சமாதானத்தையும் அன்றாட வாழ்வில் அனுபவித்து வாழுகின்ற அருளைத் தாரும். இயேசுவின் வழியே ஆமேன்.